Santa Katalinaren monasterioa (antzinako grezieraz: Μονὴ τῆς Ἁγίας Αἰκατερίνης, Monì tìs Agìas Ekaterìnis; arabieraz: دير القدّيسة كاترينا) Egiptoko monasterio ortodoxoa izan zen, Sinai mendiko arroila batean dagoena. Santa Katalina hiritik gertu kokatua, 2002an UNESCOk Gizateriaren Ondare izendatu zuen Egipton ere dagoen San Antonioren monasterioarekin batera, munduko monasteriorik zaharrenetariko bat delako.
Santa Katalina Alexandriakoaren ustezko hilobian kokaturik, Justiniano I.ak eraiki zuen Moisesek zuhaixka sutan ikusi zuen lekuan.
Santa Elenak (Konstantino I.a Handia enperadorearen ama) agindu zuen Moisesek Jaungoikoarekin hitz egin zuen lekuan (tradizioak zioenez) kapera bat egiteko. Gerora, Justiniano I.a enperadoreak han bertan, kaperaren ondoan monasterioa egiteko agindu zuen, eta 527-565. urte bitartean eraiki zuten.
Diotenez, han daukaten laharra Biblian aipatzen den bera da; horregatik, hiru erlijio handirentzako leku sakratua da: judaismorako, kristautasunerako eta islamerako.