Osaka nazioarteko aireportua (japonieraz: 大阪国際空港 Ōsaka Kokusai Kūkō) , (NAGE: ITM, NAZE: RJOO), Japoniako Osaka hiritik gertu dagoen aireportua da, Itami (Hyōgo) eta Toyonaka (Osaka) udalerrietan kokaturik dagoena. Sarritan Itami aireportua (japonieraz: 伊丹空港 Itami Kūkō) izenarekin ezagutzen da.
Nazioarteko izena badu ere Japonia barneko hegaldiak kudeatzen ditu. Hala ere Japoniako hirugarren aireportu erabiliena da. Osakako Badian dagoen Kansai nazioarteko aireportua da nazioarteko hegaldiak dituena.
Kizu ibaiaren ahoan zegoen hidrohegazkinen basean 1939an No. 2 Osaka Airport izenarekin sortu zen aireportua. Yamato ibaiaren ahoan No. 1 Osaka Airport eraikitzeko asmoa bazen baina Kobeko biztanleen protestek egitasmoa geldiarazi zuten. Hasiera hartan Japoniako Aire armadak erabili zuen baina 1945ean Estatubatuarren basea bihurtu zen, Itami Aire Basea izenarekin.
1959an Japoniako Gobernuaren kontrolpera itzutzean Osakako aireportua izena eman zitzaion berriz. 60. hamarkadan inguruko lurrak eskuratu eta nabarmen handitu zuten aireportua. Nazioarteko aireportua zen orduan.
Dena dela, ingurua populatuz joan zen eta dentsitatea handitzerakoan bizilagunek kutsadura eta zarata handia salatu eta protestak hasi zituzten. Epaitegiek 70. hamarkadan aire trafikoaren mugak ezarri zizkioten aireportuari.
1994an Kansai nazioarteko aireportua ireki zen Osakako Badian dagoen uharte artifizial batean eta Osaka aireportuarentzako Japonia barneko hegaldiak uzti zituzten.
| Wikimedia Commonsen badira fitxategi gehiago, gai hau dutenak: |
