Mannheimgo gaztelua (alemanez Mannheimer Schloss) Baden-Württemberg estatuko bigarren hiria den Mannheim hiriko gaztelua da. Sortu zenean Palatinatuko Printze-Hautesleen egoitza izan zen eta gaur egun Mannheimgo Unibertsitatea dago bertan.
1606an sortu zen Mannheim hiri gotortua zen, bertan Friedrichsburg gotorlekua baitzegoen, non noizean behin Palatinatuko Printze-Hautesleak egoten baitziren.
Gaur egungo jauregia XVIII mendekoa da. 1720an Karlos Felipek gortea zegoen Heidelbergeko hiritarrekin erlijio arazoak izan zituen eta Mannheimera etortzea erabaki zuen, hau Palatinatuko hiriburu bihurtuz. Berehala jauregi berri bat eraikitzeari ekin zion. 300.000 gulden kostatzekoa zen obrak azkenean bi milioitik gora kostatu zuen eta Palatinatua diru gabe geldituko zenaren beldur, lanak 1731ean amaitu beharrean 1760an bukatu ziren.
Mannheimgo Urrezko Aroa izan zen, gortan artea, musika eta zientziak nabarmen landu baitziren. Bertan izan ziren besteak beste Goethe eta Schiller idazleak eta Mozart konpositorea. 1778an ordea Karlos Teodorok Munichera joatea erabaki zuen, eta Mannheimen gainbehera etorri zen.
Bigarren Mundu Gerran oso bonbakatua izan zen. Hondarrak bota eta hiri moderno berria egitea ere pentsatu zen arren, azkenean jauregia berreraikitzea pentsatu zen. Gaur egun Mannheimgo unibertsitatearen egoitza nagusia da.
Jauregia estilo barrokoan eraikia dago. Aurrealdeak Mannheim hirirantz ematen du eta atzealdeak Rhin ibaira eta Ludwigshafen herrira. "U" itxura du, erdiko zatiak (Mittelbau) gela handi eta zabalak ditu, ekialdeko besoa (Ehrenhof Ost) mendebaldekoa (Ehrenhof West) baino luzeagoa da eta bertan daude Unibertsitateko bulegoak. Eraikinak Ehrenhof patioa inguratzen du.
