Falkland jauregia (ingelesez: Falkland Palace) Eskoziako Falkland udalerrian dagoen errege jauregia da, Fife eskualdean. A mailako eraikina izendaturik dago.
XII mendean bazen ehizaleku bat bertan. XIII mendean handitu egin zuten eremua eta gaztelu bat eraiki zuten Fifeko Earlek, MacDuff familiak. 1371 urtean armada ingelesak suntsitu zuen Falkland gaztelua.
1501 eta 1541 artean Jakue IV.ak eta Jakue V.ak gaztelu zaharra errege jauregi eder bihurtu zuten eta Stirlingeko gazteluarekin batera Eskoziako pizkundeko gaztelu bakarrak bihurtu ziren. Frantziar estiloa izanik 1541ean tenis jokaleku bat ere eraiki zuten ondoan, oraindik mantentzen dena. Jakue V.a bertan hil zen 1542an eta jauregiak hilobiratu zuten. 1543an Holyrood abadiara eraman zuten gorpua.
Estuardoen monarkentzako atseden leku bihurtu zen Falkland jauregia. Ehizan egiten zuten bertan, belatzak erabiliz ere bai, eta oreinak eta Frantziatik ekarritako basurdeak harrapatzen zituzten. Tenisean ere jokatzen zuten eta Maria I.ak jende guztia eskandalizatzen zuen tenis jokoan gizonen jantziak janzten zituelako.
XVII mendean Oliver Cromwellen tropek jauregiaren zati handi bati su eman zioten eta eraikina bertan behera utzia izan zen. Jauregia hondarretan gelditzen ari zen 1887an John Buteko 3. Markesak erosi zuenean. Hurrengo 20 urtetan berriztatze lan sakonak egin zituzten John Kinross eta Robert Weir Schultz arkitektoek. 1952an National Trust for Scotland erakundeari eman zitzaion honek kudeatu zezan.
Hiru hektarea hartzen ditu eta Lomond Hills mendilerroa dauka atzean. 1451 urtean jadanik bazen lorategi bat bertan baina gaur egun dakusaguna 1930 hamarkadan diseinatu zuen Percy Canek.
Wikimedia Commonsen badira fitxategi gehiago, gai hau dutenak: |