Bom Jesus do Monte Portugalgo Braga hiriaren ondoan dagoen Nogueiró e Tenões parrokian kokatzen den santutegia da, bere 116 metrotako eskilara barrokoagatik ezaguna.
Gurutze Santuaren kapera eraiki zuten bertan 1373an eta hainbat berriztatze izan zituen XV eta XVI mendeetan. 1629an erromesaldiak hartzeko Bom Jesus eliza eraiki zen.
Gaur egungo santutegia 1772koa da, Rodrigo de Moura Telles Bragako artzapezpikuak sustatu zuen santutegiaren eraikuntza. Hasiera batean Kristoren Nekaldia erakutsiko zuen eskailera egin zen, bidean terrakotazko irudiak zituen kaperak ezarri ziren Via Crucis-aren pasarteak azaltzen zituztenak. Ondoren zig-zag itxurako eskailerak gehitu zitzaizkion bost zentzumenei dedikaturikoak (ikusmena, usaimena, entzumena, ukimena eta dastamena). 1725ean Manuel Pinto Vilalobos arkitektuak eliza barrokoa altxatu zuen eskilararen bukaeran. Ondoren hainbat kapera gehitu zitzaizkion eta santutegiaren lanak 1772an amaitu zituzten.
Braganzako Gaspar artzapezpikuak 1781ean eskilara berriak gehitu zizkion hiru bertute teologikoak sinbolizatzen dituztenak (fedea, esperantza eta karitatea). Ondoren XVI mendeko eliza zaharra bota eta eliza neoklasiko berria eraiki zuen haren lekuan. Carlos Amarante izan zen arkitektua.
XIX mendean parke batek inguratu zuen santutegia eta Braga hiriarekin lotzeko muinoa igotzen duen funikularra ezarri zen.