Bagan (birmanieraz: ပုဂံ, bəɡàɴ ahoskatua; lehen Pagan izenaz ezaguna) Birmaniako antzinako hiriburua da, Irawadi ibaiaren ertzean dagoena. Birmaniako hiriburua izan zen 847-1287 bitartean, mongoliarrek konkistatu zuten arte. Oso eremu handia hartzen du, eta herrixka ugarik osatzen dute. Indotxinako penintsulako aztarnategi arkeologiko garrantzitsuena da, Angkor hiriaren ondotik. XIII. mendearen bukaeran 5.000 monumentu budista, monasterio eta jauregi zituen, baina horietatik 1.500 inguru baino ez dira geratzen. Anandako tenplua da monumenturik handiena (1090ean eraikia).
